МУСОДИРАИ ҲАҶМИ ЗИЁДИ МАВОДИ НАШЪАДОР

    Душанбе, 24 январ. (АМИТ «Ховар», Анварбек Сиддиқов).- Дар натиҷаи гузаронидани амалиёти фаврӣ- ҷустуҷӯӣ кормандони шӯъбаи корҳои дохилии ноҳияи Ҳамадонӣ дар ҳудуди ҷамоати деҳоти Чӯбеки ноҳияи мазкур шаҳванди Ҷумҳурии Исломии Афғонистон Шермуҳаммад валади Ёсинро дастгир намуданд. Ҳангоми кофтуков аз дохили борхалтаи номбурда мувофиқи маълумотномаи шӯъбаи ташхиси криминалӣ 54 килограмму 200 грамм маводи нашъадори навъи бангдона, 4 килограмму 75 грамм ҳашиш, 7 килограмму 645 грамм героин, 1 килограмму 300 грамм афюн, ки дар маҷмӯъ вазни умумиашон 67 килограмму 645 граммро ташкил дод, ёфт ва мусодира шуд.    Тавре аз маркази матбуоти ВКД-и Ҷумҳурии Тоҷикистон ба АМИТ «Ховар» иттилоъ доданд, нисбат ба ин қазия парвандаи ҷиноӣ оғоз шуда, тафтиш идома дорад.