СОКИНОНИ АТРОФИ НАВРӮЗГОҲРО КУҶО МЕКӮЧОНАНД?

   Душанбе, 20 январ.(АМИТ «Ховар», Марзия Саидова).- Беш аз 200 хона воқеъ дар гирду атрофи Наврӯзгоҳи шаҳрӣ /собиқ Иподдром/ кӯчонида мешаванд. Бояд зикр кард, ки Наврӯзи соли 2011 дар Душанбе дар сатҳи байналмилалӣ ва бо ҳузури меҳмонони баландпояи кишварҳои хориҷи дуру наздик доир мегардад, зеро соли гузашта бо Қарори Ассамблеяи генералии СММ Наврӯз ҷашни ҷаҳонӣ эълон гардида буд.   Сайвалӣ Сафаров муовини масъул ба бахши иқтисоди раиси шаҳри Душанбе 20 январ дар нишасти матбуотӣ ба хабарнигорон иттилоъ дод, ки ин табдир дар доираи татбиқи нақшаи генералии шаҳр амалӣ гардонида мешавад. Мавсуф афзуд, ки шаҳрдории Душанбе дар мавриди бартараф кардани иншоот ба ягон қонуншиканӣ ҳаргиз роҳ намедиҳад. Агар ягон зарар пеш ояд, тибқи талаботи қонунгузории кишвар ҷуброн мешавад.    Назар ба гуфти Сайвалӣ Сафаров дар навбати аввал сокинони 57 хона кӯчонида шуда, ба онҳо дар асоси талаботи қонунгузории кишвар хонаҳои баробарарзиш дода мешаванд. Раванди кӯчонидани соҳибмулкон ва тақсимоти манзил ба онҳо аз ҷониби маркази баҳодиҳии Кумитаи давлатии сармоягузорӣ ва идораи амволи давлатӣ, ки мақоми ваколатдор аст, баҳогузорӣ мешавад. Инчунин, ҳуҷҷатҳои соҳибмулкон аз ҷониби прокуратураи ноҳиявӣ ва шаҳрӣ мавриди омӯзиш карор дода мешаванд. Шаҳрвандоне, ки аз маҳали атрофи Наврӯзгоҳи шаҳрӣ кӯчонида мешаванд, онҳо дар кӯчаҳои Ҳофизи Шерозӣ, Ҷомӣ ва маҳаллаи Зарафшон бо манзилҳои истиқоматӣ таъмин мегарданд.