САҲМИ LG INTERNATIONAL ДАР ОМӮЗИШИ ИМКОНИЯТҲОИ САРМОЯГУЗОРӢ

Душанбе, 2 феврал. (АМИТ «Ховар», Бекназари Абӯбакр). — Раиси Кумитаи давлатии сармоягузорӣ ва идораи амволи давлатии Тоҷикистон Давлаталӣ Саидов бо роҳбари Намояндагии LG International дар Ҷумҳурии Қазоқистон Ким Генг Хо мулоқот намуд. Дар ҷараёни мулоқот Ким Генг Хо оид ба имкониятҳои ширкат дар татбиқи лоиҳаҳои сармоягузорӣ ва таҷрибаи ба роҳ мондани ҳамкориҳои судманди тарафайн дар мамлакатҳои собиқ шӯравӣ, ба монанди Қазоқистон ва амсоли инҳо маълумот дод. Қайд гардид, ки ширкати LG International дар Ҷумҳурии Қазоқистон дар самтҳои тақсимот ва идораи гардиши қувваи барқ, тозакунии обҳои шориданӣ дар шаҳру ноҳияҳо, нақлиёти ҷамъиятӣ (шаҳрӣ) ва ғайра бо роҳи азнавкунӣ ва ё бунёди иқтидорҳои нав бо усули ҷорӣ намудани технологияҳои муосири иттилоотӣ самаранок фаъолият дорад, ки ҷиҳати афзоиш ёфтани самаранокӣ, фоиданокӣ ва шаффофият фаъолияти самтҳои дар боло зикршуда мусоидат менамояд. Дар баробари ин, Ким Генг Хо ҳавасманди ширкатро оид ба баррасии лоиҳаҳои мухталифи Ҷумҳурии Тоҷикистон ва имкониятҳои ҳамкории эҳтимолии минбаъдаро изҳор намуд. Дар навбати худ раиси Кумитаи давлатии сармоягузорӣ ва идораи амволи давлатии Ҷумҳурии Тоҷикистон ба намояндаи LG International оид ба фазои сармоягузорӣ, бартариву сабукиҳои барои сармоягузорон пешниҳодшаванда маълумот дода, ба онҳо дискҳои сармоягузориро, ки дар худ маълумоти муфассал оид ба қонунгузориии ҷории танзимкунандаи фаъолияти сармоягузорӣ ва соҳибкорӣ, манбаи иттилоотии лоиҳаҳои сармоягузорӣ дар ҷумҳурӣ, имконият ва иқтидорҳои сармоягузории мамлакат ва дигар маълумоти зарурӣ барои сармоягузоронро таҷассум мекунад, тақдим намуд. Аз Кумитаи сармоягузорӣ ба АМИТ «Ховар» иттилоъ доданд, ки дар натиҷа ҷонибҳо оиди ба роҳ мондани ҳамкории минбаъда ҳавасмандии тарафайнро изҳор намуда, зикр намуданд, ки баъд аз омӯзиш ва баррасии лоиҳаҳои сармоягузорӣ аз ҷониби мутахассисони ширкат ҷиҳати татбиқи лоиҳаи судманд хулосаи ниҳоии онҳо ирсол  мегардад.