Афсарони тоҷик курсҳои навбатиро хатм карданд

Душанбе, 3 август (АМИТ «Ховар», Пайрав Назаров). – Тавре дар Сафорати ИМАдар Тоҷикистон ба АМИТ «Ховар» иттилоъ доданд, 23 нафар кормандони Вазорати корҳои дохилӣ, Вазорати адлия ва Кумитаи давлатии амнияти миллии Тоҷикистон курси «Таҷзияи судии маҳалли содиршавии амали террористӣ» — ро хатм намуданд. Мувофиқи суханони манбаъ, афсарони мақомоти ҳифзи ҳуқуқи Тоҷикистон усулҳои барқарор намудани далел аз маҳалли ҷиноят, ҳамчунин тартиб додани аснод ва таҳияи санадҳои исботиро барои тафтиши минбаъдаи судӣ бо истифода аз усулҳои дахлдори меъёри судӣ аз худ намуданд. Сафири ИМА дар Тоҷикистон Кен Гросс зимни суханрониаш дар маросими хатми курсҳо зикр намуд, ки «таҷзияи судӣ бахши асосии тафтиши ҳар амали террористӣ ва омили муборизаи зидди терроризм аз ҷониби Ҳукумати Тоҷикистон маҳсуб мешавад. Афсарони сафи пеши мақомоти ҳифзи ҳуқуқи Тоҷикистон бояд малакаи зарурӣ пайдо намоянд, то ки макони ҷиноятро барои ба ҳабс гирифтани ҷинояткорон ва гузаронидани тафтишоти судии айбдорон бо камоли кордонӣ тафтиш намоянд». Курси таҷзияи судии маҳалли содиршавии амали террористӣ соли 2011 бо дастгирии молиявии Бюрои амнияти минтақавии Сафорати ИМА таъсис ёфта буд. Аз соли 2002 дар барномаҳои курси таълимӣ беш аз 440 нафар мансабдорони давлатӣ иштирок намуданд.