Хизматчиёни давлатии Тоҷикистон дар Ҷопон таҳсил мекунанд

Душанбе, 24 август (АМИТ «Ховар», Пайрав Назаров). – Бо мадади Агентии ҳамкории байналмилалии Ҷопон 28 август гурӯҳи мутахассисони тоҷик барои таҳсил дар донишгоҳҳои Ҷопон ба ин кишвар сафар мекунад.Тавре дар намояндагии Агентии ҳамкории байналмилалии Ҷопон дар Тоҷикистон ба АМИТ «Ховар» иттилоъ доданд, мувофиқи ин лоиҳа, ки аз соли 2008 инҷониб дар амал татбиқ мешавад, ҳукумати Ҷопон тайи 4 сол барои гузоштани саҳм ба такмили ихтисоси хизматчиёни давлатии Вазорати корҳои хориҷӣ, Вазорати молия, Вазорати рушди иқтисод ва савдо ва Бонки миллии Тоҷикистон кӯмак мекунад.Имсол ба ҳайати гурӯҳ 2 намояндаи Вазорати рушди иқтисод ва савдо, як намояндаи Вазорати молия ва намояндаи Бонки миллии Тоҷикистон дохил шудаанд, ки аз рӯи барномаи ташаккули механизми гузаштан ба иқтисоди бозаргонӣ дар Донишгоҳи Ритсумэйкани Осиё ва Уқёнуси Ором ба Ҷопон мераванд.