Конфронси экологӣ ба ифтихори ҷашн

Душанбе, 16 август (АМИТ «Ховар», Лутфия Эшонқулова). – Ба ифтихори 20 – умин солгарди Истиқлолияти давлатии Ҷумҳурии тоҷикистон аз 19 то 21 сентябр дар шаҳри Душанбе конфронс бахшида ба ҷамъбасти «Экспедитсияи якуми илмии байналмилалӣ ба болооби дарёҳои Вахш ва Панҷ» баргузор мешавад.Ин чорабинӣ бо ибтикори Кумитаи ҳифзи муҳити зисти назди Ҳукумати Ҷумҳурии Тоҷикистон ва Барномаи рушди СММ, Барномаи оид ба идораи хатарҳои иқлимии Осиёи Марказӣ сурат мегирад. Мувофиқи суханони сардори экспедитсия профессор Абдулҳамид Қаюмов — узви вобастаи Академияи муҳандисии ҶТ, натиҷаи экспедитсия имкон медиҳад, ки мероси миллӣ — ҷамъбасти фаъолияти наслҳои мухталифи муҳаққиқони тоҷику шӯравӣ барои истифодаи минбаъда ҳифз шавад.