Қадршиносии кишоварзон бо мукофотҳои давлатӣ

Душанбе, 7 сентябр. (АМИТ «Ховар», Дилшодаи Хайруллоҳ).- Дар Вазорати кишоварзии Ҷумҳурии Тоҷикистон бахшида ба ҷашни 20-умин солгарди Истиқлолияти давлатии ҶТ маҷлиси тантанавӣ бо иштироки кормандони дастгоҳи марказӣ ва зерсохторҳои вазорат доир гардид. Дар ҷаласаи тантанавӣ сардори шӯъбаи кишоварзӣ ва истифодаи замини Дастгоҳи иҷроияи Президенти Ҷумҳурии Тоҷикистон Ҷалил Пириев, Президенти Академияи кишоварзии Тоҷикистон Ҳикматулло Аҳмадов, ректори Донишгоҳи аграрии Тоҷикистон Иззатулло Сатторӣ иштирок намуда сухан гуфтанд. Вазири кишоварзӣ Қосим Қосимов перомуни таърихи Истиқлолияти давлатии Тоҷикистон гуфт, ки 20 сол муқаддам миллати куҳанбунёду соҳибфарҳанги тоҷик ба дастоварди бузург — Истиқлолияти давлатӣ ноил гардид, ки ҳоло мо ин рӯйдоди муборак, яъне пайвастани оини давлатдории навини худ бо силсилаи давлатдориҳои чандинҳазорсолаи ниёгонамонро бо камоли ифтихору сарфарозӣ ҷашн мегирем.Вазири кишоварзии ҷумҳурӣ аз номи Ҳукумати Ҷумҳурии Тоҷикистон ба 17 нафар кормандони соҳаи кишоварзӣ мукофотҳои давлатӣ супорид. Аз ҷумла, ба сарчӯпони хоҷагии зотпарварии “Тебалай”-и ноҳияи Мӯъминобод Тағайбой Пилолов ва мудири кафедраи механикӣ ва ҷузъиёти мошинҳои кишоварзии Донишгоҳи аграрии Тоҷикистон Сироҷиддин Тиллоев «Ордени Шараф- дараҷаи 1», ҳамзамон ба 7 нафар медали “Хизмати шоиста”, ба 6 нафар медали “Ҷашни 20-солагии Истиқлолияти давлатии Ҷумҳурии Тоҷикистон” ва ба 2 нафар “Ифтихорнома”-и Ҷумҳурии Тоҷикистон дода шуд.