Боздиди Сарвари Давлат аз Донишгоҳи технологии Тоҷикистон

Душанбе, 1 сентябр. (АМИТ «Ховар», Дилшодаи Хайрулло).- Субҳи имрӯз Президенти Ҷумҳурии Тоҷикистон Эмомалӣ Раҳмон ба муносибати Рӯзи дониш ва оғози соли нави таҳсил, ки  имсол ба ҷашни  муқаддаси миллиамон — бистумин солгарди Истиқлолияти давлатӣ рост омад,  ба Донишгоҳи технологии Тоҷикистон ташриф овард. Президенти кишвар бо намояндагони таълимгоҳҳои      олӣ ва аҳли илму маориф, ихтироъкорон ва навоварони ҷавон мулоқоти ошкорову судманд доир намуда, зикр намуд, ки «Яке аз шартҳои асосии тарбия ва камолоти маънавии инсон омӯхтани илму дониш мебошад. Вақте инсон аз донишҳои гуногуни замона баҳра мебардорад, дар навбати аввал худро мешиносад ва баъдан ба фалсафаи зиндагӣ ва арзишҳои фарҳанги башарӣ таваҷҷӯҳ зоҳир менамояд». Таъкид карда шуд, ки  донишҷӯёне, ки дар бахшҳои илмҳои дақиқ таҳсил мекунанд ва соҳиби касбу ҳунар мегарданд, пеш аз ҳама бояд эҷодкор бошанд ва мутобиқи имконияту захираҳои мавҷудаи кишвар лоиҳаҳои асоснокшудаи инноватсиониро таҳия ва татбиқ намоянд.Президенти кишвар Эмомалӣ Раҳмон  бо мақсади омода намудани мутахассисони варзида ва баланд бардоштани дараҷаи тахассусии онҳо Вазорати маорифро дар якҷогӣ бо вазорату кумитаҳои дахлдорро вазифадор намуд, ки то охири соли ҷорӣ талаботи касбии ҳар як ихтисосро мавриди омӯзиш қарор дода, вобаста ба татбиқи сиёсати давлатии инноватсионӣ санадҳои дахлдорро дар таҳрири нав пешниҳод намоянд. Изҳори қаноатмандӣ карда шуд, ки баъди эълони «Соли маориф ва фарҳанги техникӣ»   теъдоди зиёди хонандагону донишҷӯёни кишвар ба техникаву технологияи навин таваҷҷӯҳи зиёд пайдо намудаанд. Боиси қаноатмандист, ки онҳо дар озмуну намоишгоҳҳои гуногуни бонуфуз   иштироки  фаъолона менамоянд.