Мулоқоти хоссаи Эмомалӣ Раҳмон бо Дмитрий Медведев

Душанбе, 2 сентябр. (АМИТ «Ховар», Дилшодаи Хайрулло). — Ин лаҳзаҳо дар Қасри миллат мулоқоти як ба яки Президенти Ҷумҳурии Тоҷикистон Эмомалӣ Раҳмон бо Президенти Федератсияи Русия Дмитрий Медведев ҷараён дорад. Гуфта мешавад, ки дар ҷараёни ин мулоқот масоили сиёсӣ, иқтисодӣ ва фарҳангии ҳарду кишвар баррасӣ мешаванд. Пас аз мулоқоти як ба як, ҳамчунин мулоқоти ҳайатҳои расмии Тоҷикистону Русия бо иштироки сарони ҳарду давлат доир шуда, масоили таваҷҷӯҳи тарафайн муҳокима ва баррасӣ мегарданд. Дар фарҷоми мулоқоти ҳайатҳои расмии Тоҷикистону Русия имзои 3 созишнома -Изҳороти муштараки роҳбарони ду давлат, Барномаи ҳамкории иқтисодии байни ҶТ ва ФР барои солҳои 2011 – 2014 ва Созишнома дар бораи ҳамкории сарҳадӣ дар назар аст. Аз натиҷаҳои ин мулоқот ба доираи васеи хабарнигорон дар нишасти матбуотии сарони давлатҳои Тоҷикистону Русия Эмомалӣ Раҳмон ва Дмитрий Медведов иттилоъ дода мешавад. Ёдовар мешавем, ки бо даъвати Президенти Ҷумҳурии Тоҷикистон Эмомалӣ Раҳмон 2 сентябр Президенти Федератсияи Русия Дмитрий Медведев ба Ҷумҳурии Тоҷикистон ташрифи расмӣ овард.