Боздиди вазир аз ду махзани илм

Душанбе, 27 декабр.(АМИТ «Ховар», Марзия Саидова).-Дар партави дастуру супоришҳои Президенти ҷумҳурӣ Эмомалӣ Раҳмон муовини Сарвазири ҷумҳурӣ Руқия Қурбонова ва вазири маорифи мамлакат Абдуҷаббор Раҳмонов бо ҳайати устодону донишҷӯёни донишкадаву донишгоҳҳои Тоҷикистон вохӯрӣ анҷом дода, бо вазъи таълиму тарбия шинос гардиданд.  «Ҳадаф аз ин мулоқот огоҳ шудан аз шароити таҳсили донишҷӯён, шиносоӣ бо вазъи таҳсил ва баррасии мушкилоти ҷойдошта мебошад», мегӯяд Сиддиқ Муборак, котиби матбуоти Вазорати маорифи ҷумҳурӣ. Дар вохӯриҳо ҳамзамон оид ба сиёсати роҳбарияти давлату ҳукумат нисбат ба мактабу маориф, ҷавонон, масъалаи баланд бардоштани сифати таълиму тарбия, мутобиқ сохтани раванди таълим ба талаботи меъёрҳои байналмилалӣ, дар байни ҷавонону наврасон ба роҳ мондани корҳои фаҳмондадиҳӣ, ворид нашудани ҷавонон ба ҷараёнҳои тундрав, талқини ҳисси худшиносиву худогоҳии миллӣ ибрози назар карда шуд. Дар анҷом устодону донишҷӯён ба муовини Сарвазири ҷумҳурӣ ва вазири маориф пешниҳодҳои худро баён намуданд.