Тоҷикистону Малайзия санади ҳамкорӣ ба имзо мерасонанд

Душанбе, 27 декабр.(АМИТ «Ховар»,Марзия Саидова).-Самтҳои афзалиятноки ҳамкориҳои судманди Тоҷикистону Малайзия дар бахши маориф зимни мулоқоти вазири маорифи ҷумҳурӣ Абдуҷаббор Раҳмонов бо президенти Донишгоҳи техникию эҷодии «Лимкоквинг»-и Малайзия дар Душанбе баррасӣ шуд.  Дар мулоқот ҷонибҳо оид ба ҳамкориҳои тарафайн мубодилаи афкор намуданд. Зикр шуд, ки дар оянда равобитро дар самтҳои таҳсилот дар зинаҳои гуногун тақвият мебахшанд. Ҳамкории Тоҷикистон бо Малайзия дар бахши маориф солҳои охир густариш меёбад. Дар доираи Барномаи ҳамкориҳои техникӣ бо Малайзия ҳамасола барои шаҳрвандони Тоҷикистон дар муассисаҳои таҳсилоти олии Малайзия бурсияҳо ҷудо мешаванд. Соли равон лоиҳаи Ёддошти тафоҳум байни Ҳукумати Ҷумҳурии Тоҷикистон ва Ҳукумати Ҷумҳурии Малайзия оид ба ҳамкорӣ дар соҳаи таҳсилоти олӣ таҳия ва бо вазоратҳои дахлдори ҷумҳурӣ мувофиқа ва ба ҷониби Малайзия ирсол шудааст. Бояд зикр намуд, ки Маркази барномаҳои байналмилалии Вазорати маорифи Тоҷикистон бо Донишгоҳи техникию эҷодии «Лимкоквинг»-и Малайзия шартномаи ҳамкорӣ дорад, ки мувофиқи он 5 нафар шаҳрванди Тоҷикистон дар ин донишгоҳ таҳсил менамоянд.