Ҳамкории минтақаҳои озоди иқтисодии «Суғд» ва «Лайлак»

Душанбе, 31 январ. (АМИТ «Ховар», Покиза Маҳмадбекова). – 30 январи соли равон дар вилояти Суғд байни минтақаи озоди иқтисодии «Суғд» ва минтақаи озоди «Лайлак»-и Ҷумҳурии Қирғизистон Ёддошт доир ба ҳамкории дуҷонибаи иқтисодӣ ба имзо расид. Ба АМИТ «Ховар» аз Хадамоти матбуоти раиси вилояти Суғд иттилоъ доданд, ки мақсад аз имзои ин созишнома ташкили ҳамкории байниҳамдигарии иттилоотӣ, дастгирии сармоягузорон баҳри татбиқ ва маблағгузории лоиҳаҳои инноватсионии ҳудуди минтақаи озодӣ иқтисодӣ мебошад. Бояд гуфт, ки ин санад муддати се сол татбиқ гардида, ҳамкории дуҷониба дар ташкили намоишҳо, конфронсу симпозиумҳо ва дастгирии ҳамкориҳо ва ташкили бозорҳои нав роҳандозӣ мешавад. Ҳамчунин Ёддошт ба ҷалби сармоягузорони хориҷӣ мусоидат намуда, барои рушди марказҳои савдо, бозор, мағозаҳо ва соҳибкорон таъсири хуб мебахшад. Бояд гуфт, ки ба ин санад зиёда аз 15 ташкилоти иқтисодии кишварҳои гуногун имзо мондаанд.