Истеҳсоли дару тирезҳои пластикӣ дар Суғд

Душанбе, 2 феврал. (АМИТ «Ховар», Покиза Маҳмадбекова). — Дирӯз намояндагони маъмурияти минтақаи озоди иқтисодии «Суғд» аз ҷараёни корҳои сохтмонии коргоҳи «Равзана Пластик» дидан карданд.  Ба мухбири АМИТ «Ховар» аз Хадамоти матбуоти Раиси вилояти Суғд иттилоъ доданд, ки корхонаи мазкур аввалин шуда моҳи апрели соли равон дар Тоҷикистон истеҳсоли ҷузвҳои пластикиро барои сохтани дару тирезаҳои пластикӣ ба роҳ мемонад. Ин коргоҳ бо дастгирии сармоягузорони хориҷӣ бо васоили техникии муосир таъмин гаштааст. Маҳсулоти «Равзана Пластик» минбаъд дар бозори кишвар рақобатпазир хоҳад шуд. Корхонаи «Равзана Пластик», ки дар минтақаи озоди иқтисодии «Суғд» тирамоҳи соли гузашта ба қайд гирифта шудааст, сохтмони нави сехи истеҳсолиро дар муддати шаш моҳ ба анҷом расонид. Алҳол корҳои насбу танзими таҷҳизоти техникӣ оғоз шудааст.