Густариши ҳамкориҳои Бонки рушди Осиё бо кишоварзон
Душанбе, 30 март. (АМИТ «Ховар», Дилшодаи Хайруллоҳ).- 29 марти соли равон дар Вазорати кишоварзии Ҷумҳурии Тоҷикистон вохӯрии муовини аввали вазири кишоварзӣ С.Рустамов бо намояндагони Бонки рушди Осиё (АБР) доир гардид. Зимни вохӯрӣ тарафҳо доир ба рафти ҷараёни лоиҳаи “Рушди деҳот” махсусан дар соҳаи кишоварзӣ изҳори ақида намуданд.Намояндаи Бонки рушди Осиё иқтисодшиноси дар соҳаи захираҳои табиӣ ва кишоварзӣ ҷаноби Ренал Ҷонс ҷараёни татбиқи лоиҳаи рушди деҳотро, ки он аз тарафи Муассисаи давлатии “Маркази идораи лоиҳаи “Рушди деҳот” амалӣ мегардад, мусбат арзёбӣ намуд.Ёдовар мешавем, ки мақсади лоиҳаи мазкур аз баланд бардоштани даромади кишоварзӣ ва ғайрикишоварзии аҳолии деҳот, афзудани маҳсулнокии хоҷагиҳои деҳқонӣ ва корхонаҳои кишоварзии ноҳияҳои пилотӣ дар доираи устувори сохтори идоракунӣ ва муҳити зист, пешниҳоди кӯмак ва дастгирии хоҷагиҳои деҳқонии инфиродӣ ва кооперативӣ, аҳолӣ ва соҳибкорони хусусии деҳот иборат аст. Дар айни замон дар ноҳияҳои пилотии Рӯдакӣ, Варзоб, Ваҳдат, Файзобод ва шаҳри Роғун як силсила корҳои амалӣ, аз ҷумла сохтмони роҳу пулҳо ва кашидани хати оби нӯшокӣ ба аҳолии деҳот бо дастгирии молиявии лоиҳаи мазкур ба анҷом расид.