Наврӯз дар мактаб – интернат

Душанбе, 30 март. (АМИТ «Ховар», Пайрав Назаров). – 29 март дар Мактаб – интернати рақами 4 – и шаҳри Душанбе, ки таҳти парастории Вазорати корҳои хориҷии ҶТ қарор дорад, ба ифтихори Наврӯзи оламафрӯз маросими идона баргузор гардид, ки дар он вазири корҳои хориҷии ҶТ Ҳамрохон Зарифӣ ва Ҳамоҳангсози доимии Созмони Милали Муттаҳид, роҳбари Намояндагии Барномаи рушди СММ дар Тоҷикистон Александр Зуев ширкат доштанд.Ҳамрохон Зарифӣ толибилмони интернатро бо Рӯзи байналмилалии Наврӯз муборакбод намуда, ба онҳо дар таҳсилашон комёбиҳо орзу кард. « Ҳукумати Ҷумҳурии Тоҷикистон кӯшиш менамояд, ки барои ояндаи дурахшони шумо ҳамаи шароитро фароҳам орад», — гуфт вазири корҳои хориҷӣ. Сипас хонандагони мактаб барномаи консертиашонро намоиш доданд. Намоиши либосҳои миллӣ, мусобиқоти варзишӣ, саҳначаҳои гуногуни театрӣ, суруди «фалак» ва рақси бадахшонӣ дар иҷрои хонандагони синфҳои ибтидоии мактаб писанди меҳмони сершумор гардиданд.Дар ин бора аз Раёсати иттилоот, матбуот, таҳлил ва тарҳрезии сиёсати хориҷии ВКХ ҶТ ба АМИТ «Ховар» хабар доданд.