Таҷлили наврӯзи ҷавонон дар «Ориёно»

Душанбе, 29 март. (АМИТ «Ховар», Дилшодаи Хайруллоҳ).- Имрӯз дар Маркази фарҳангии ҷавонон «Ориёно» бо ташаббусу ибтикори Кумитаи ҷавонон, варзиш ва сайёҳии назди Ҳукумати Ҷумҳурии Тоҷикистон бахшида ба иди байналмилалии Наврӯз таҳти унвони “Наврӯзи ҷавонони ҷаҳон” чорабинии фарҳангӣ доир гардид. Раиси Кумита Маликшо Неъматов аз дастовардҳои ихтироъкорони ҷавон дидан намуда, ба ихтирои ҷавонони даврони истиқлолият баҳои баланд дод.Ҳамзамон дар хатнасури 8 нафар кӯдак ва тӯйи хонадоршавии се ҷуфт ҷавон иштирок намуда, тӯҳфаҳои таъсиснамудаи Кумитаро дар рӯҳияи тантанавӣ ба ҷавонон супорида, баргузории тӯйи хонадоршавии онҳоро дар ин рӯзи саид фоли нек ва идомаи анъанаи ниёгони бузургамон маънидод намуд.Дастурхони наврӯзии ҷавонон, ки бо таомҳои миллӣ ва суманак оро ёфта буд, тарғибгари таомҳои миллӣ ва наврӯзии мо буда, ба ҷавонон ҳисси ватандӯстӣ ва арҷ гузоштан ба суннатҳои ниёгонро талқин менамояд.