Нақлиёти бе бензин ҳаракаткунанда
Душанбе, 3 апрел. (АМИТ «Ховар», Лаззат Диловарзод).- Бино ба гуфти сардори раёсати газу нафти Вазорати энергетика ва савдо Ёрмаҳмад Бегмаҳмадов, бо вуҷуди нисбат ба ҳамин давраи соли 2011 камтар ворид шудани маҳсулоти нафтӣ камбуди сӯзишворӣ дар нуқтаҳои фурӯши сӯзишворӣ ҳис карда намешавад, зеро аксарияти нақлиёти шаҳрию беруназшаҳрӣ тавассути гази моеъ ҳаракат мекунад.Ба иттилои манбаъ, соли ҷорӣ ҳаҷми воридоти гази моеъ аз Ҷумҳурии Қазоқистон чор маротиба афзоиш ёфтааст. Дар айни замон панҷ ширкат – «Тоҷирон», «Фароз», «Зетгаз», «Газпромнефт- Тоҷикистон» ва «Муҳаммад Пӯлод» ба воридоти гази моеъ аз Русия, Қазоқистон, Ӯзбекистону Туркманистон машғуланд.Боиси зикр аст, ки воридоти сӯзишвории дизелӣ нисбат ба ҳамин давраи соли 2011 беш аз ду ҳазор тонна афзоиш ёфтааст. Ин тадбир имкон медиҳад, ки кишоварзон бе танқисии сӯзишворӣ кишти баҳориро идома диҳанд.