Вохӯрии А. Раҳмонов бо соҳибкорон

Кӯлоб, 6 июн. (АМИТ «Ховар», С.Холов). – Чанде қабл раиси шаҳри Кӯлоб Абдуғаффор Раҳмонов бо соҳибкорони маҳаллӣ вохӯрд. Дар вохӯрӣ зикр шуд, ки дар айни замон дар шаҳру ноҳияи Кӯлоб беш аз 3000 соҳибкори инфиродию ташкилоту корхонаҳои хусусӣ ба қайд гирифта шудаанд, аммо таҳлилҳо нишон медиҳанд, ки на ҳамаи онҳо фаъолияти воқеӣ доранд. Аз ин рӯ таъсиси Шӯрои машваратӣ доир ба рушди соҳибкорӣ дар назди мақомоти маҳаллӣ, ҳамчунин тарҳрезӣ ва мавриди амал қарор додани «Барномаи рушди шаҳри Кӯлоб барои солҳои 2011 – 2015» ва дар заминаи онҳо таъсиси Кумитаи тараққиёти маҳал, ки ба узвияти он намояндагони мақомоти маҳаллӣ ва соҳибкорон шомиланд, тадбири саривақтӣ маҳсуб мешавад. Дар ҳамоиш соҳибкорон аз бунёди корхонаҳои ранги сохтмонӣ, ҳавзҳои моҳипарварӣ, гармхонаҳо, ба роҳ мондани кишти зериплёнкагии меваю сабзавоти барвақтӣ, инкишофи зироаткорию чорводорӣ сухан гуфта, баҳри вусъати корҳо таклифу пешниҳод ироа намуданд.