3 ҳазору 500 ҷойи корӣ

Душанбе, 4 июл. (АМИТ «Ховар», Лаззат Диловарзод).-Тибқи маълумоти «Ташкилоти Оғохон оид ба Рушд» (ТОР) дар қаламрави Ҷумҳурии Тоҷикистон тавассути амалисозии барномаҳои ташкилоти мазкур 3 ҳазору 500 ҷойи корӣ барои сокинони ҷумҳурӣ муҳайё сохта шудааст. «Ташкилоти Оғохон оид ба Рушд» дар бахшҳои иқтисод, маориф, тандурустӣ, фарҳанг, молия ва рушди деҳоти Тоҷикистон 20 сол боз ҳамкорӣ дорад.Боиси зикр аст, ки ТОРдар Ҷумҳурии Тоҷикистон аз соли 1992 бо истифода аз таҷриба дар манотиқи кӯҳистони ВМКБ, вилоятҳои Хатлону Суғд тавассути барномаҳо оид ба рушди деҳот фаъолияташро роҳандозӣ намудааст.Шоҳзода Ҳусайн Оғохон- фарзанди Волоҳазрат Оғохони-1V, ки меҳмони кишвари мост, дар давоми сафари серӯзаи худ ба Тоҷикистон, бо раванди иҷрои барномаҳои ТОР ошно мегардад. Ба иттилои манбаъ, нӯҳ агентии ташкилоти мазкур барои ҳамаи афрод новобаста аз мансубияти ҷинсӣ, қавмӣ ва динӣ, ки дар манотиқи дорои шароити сахт дар кишварҳои Африқо, Осиёи Марказӣ ва Ҷанубӣ ва Шарқи Миёна зиндагӣ мекунанд, кӯмаки иҷтимоӣ мерасонад.«Ташкилоти Оғохон оид ба Рушд» дар Ҷумҳурии Тоҷикистон бонки хурди молиявии худро таъсис додаст, ки рушди ҳамаи шаклҳои хоҷагидориро дастгирӣ менамояд.