Боздиди парламентарҳои тоҷик аз қароргоҳи СААШ

Душанбе, 9 июл.(АМИТ «Ховар», Марзия Саидова).-Гурўҳи вакилони палатаи поёнии парлумони Тоҷикистон – Сайфулло Гиёев, Насрулло Маҳмудов, Баракатулло Атохоҷа ва Абдузафар Имомов дар нишасти парламентарҳои кишварҳои Осиёи Марказӣ ва Афғонистон, ки бо ибтикори бахши ҷамъиятии Созмони Аҳдномаи Атлантикаи Шимолӣ /НАТО/ дар Белгия доир гардид, иштирок намуданд. Дар доираи нишасти мазкур таҳти унвони «Дурнамои ҳамкории Созмони Аҳдномаи Атлантикаи Шимолӣ бо кишварҳои Осиёи Марказӣ» сўҳбати мизи мудаввар доир гардид, ки дар он вакили Маҷлиси намояндагон Сайфулло Гиёев доир ба мавқеи Ҷумҳурии Тоҷикистон дар арсаи байналмилалӣ табодули назар кард. Мавсуф зикр намуд, ки сиёсати пешгирифтаи Раҳбарият ва Ҳукумати Ҷумҳурии Тоҷикистон сиёсати «дарҳои боз» буда, он барои тавсеаи робитаҳои устувору судманд ва дўстонаи Тоҷикистон бо кишварҳои ҷаҳон ва созмонҳои байналмилалию минтақавӣ, ки ба истиқлолияти давлатӣ, манофеи миллии Ҷумҳурии Тоҷикистон эҳтиром мегузоранд, мусоидат менамояд. С. Гиёев ба масъалаи ҳамкории Тоҷикистон бо НАТО дахл намуда, зикр кард, ки Тоҷикистон асосан дар самти мубориза бар зидди терроризми байналмилалӣ, қочоқи маводи мухаддир ва дигар зуҳуроти номатлуб бо ин созмон қадамҳои ҷиддӣ мегузорад. Вакили парлумони Тоҷикистон ҳамзамон таваҷҷўҳи аҳли нишастро ба қазияи Афғонистон ҷалб намуда, гуфт, ки Тоҷикистон аз рўзҳои нахустин бо нерўҳои байналмилалии зиддитеррористӣ ҳамкорӣ дорад. Мавқеи Тоҷикистон дар мавриди ҳалли қазияи Афғонистон ва таъмини сулҳу субот дар ин сарзамин борҳо тавассути суханрониҳои Президенти Ҷумҳурии Тоҷикистон Эмомалӣ Раҳмон аз минбарҳои баланд садо додааст. Вакили палатаи поёнии парлумони Тоҷикистон ҳамзамон истифодаи таҷрибаи сулҳи тоҷиконро дар мавриди ҳалли низоъ ва таъмини сулҳу оромӣ дар сарзамини Афғонистон таъкид кард.