Фаъолияти 178 ҳазору 892 субъекти хоҷагидор

Душанбе, 23 июл. (АМИТ «Ховар», Лаззат Диловарзод).- Дар нимсолаи якуми соли 2012 дар бораи вазъи иҷтимоию иқтисодии ҷумҳурӣ дар васоити ахбори омма маълумоти мухтасар чоп гардид, инчунин барои хабарнигорони дохилию хориҷӣ конфронси матбуотӣ доир карда шуд, барои қонеъ гардонидани эҳтиёҷоти истифодабарандагони маълумоти оморӣ ва шаффофияти он 18 пахши иттилоотӣ бо се забон чоп ва хазинаи маълумот дар вебсайт нав карда шуд,-иброз дошт директори Агентии омори назди Президенти ҷумҳурӣ Бахтия Муҳаммадиева имрӯз, 23 июл дар нишасти матбуотӣ.Ба гуфти Б.Муҳаммадиева аз 1-уми июли соли 2009 то 1-уми июли соли ҷорӣ шумораи субъектҳои бақайдгирифташуда дар «Равзанаи ягона» 230 ҳазору 586 ададро ташкил намуд, ки аз онҳо 204 ҳазору 898 ададашон соҳибкорони инфиродӣ буданд. Дар ин давра 51 ҳазору 694 субъекти хоҷагидор барҳам дода шуд, ки аз онҳо беш аз 51 ҳазорашон соҳибкори инфиродӣ буданд. Б. Муҳаммадиева ҳамчунин иброз дошт, ки дар айни замон дар саросари ҷумҳурӣ 178 ҳазору 892 субъекти хоҷагидор фаъолият мебаранд, ки аз онҳо 24 ҳазору 724-тояшонро шахсони ҳуқуқӣ, 320 филиал-намояндагиҳои шахсони ҳуқуқии хориҷӣ ва 153 ҳазору 843 нафар соҳибкорони инфиродӣ мебошанд. Директори Агентии назди Президенти ҷумҳурӣ Б.Муҳаммадиева аз хабарнигорони ватанӣ хоҳиш намуд, ки дар истифодаи рақамҳои оморӣ ба таҳриф роҳ надиҳанд, то дар саҳифаҳои матбуоти хориҷӣ пешрафти иқтисодиёти мо нодуруст инъикос нагардад.Тавассути саволу ҷавоб қариб тамоми фаъолияти Агентӣ таҳлил гардид.Хабарнигорон ба беш аз 20 саволи худ аз ҷониби мутахассисони Агентӣ, ки дар нишасти матбуотӣ иштирок доштанд, ҷавобҳои қаноатбахш гирифтанд.