Иншоот дар деҳаи Кадучи

Восеъ, 4 июл. (АМИТ «Ховар», С.Холов). – Дар арафаи ҷашни 15–умин солгарди ба имзо расидани «Созишномаи истиқрори сулҳ ва Ваҳдати миллӣ» сокинони деҳаи Кадучии ноҳияи Восеъ бо оби ошомиданӣ таъмин гардиданд. Бояд қайд намуд, ки деҳаи мазкур дар ҷамоати деҳоти ба номи Мирзоалӣ Вайсов калонтарин буда, дар он беш аз 10 ҳазор аҳолӣ зиндагӣ мекунад ва дар давоми 15 сол аз нарасидани оби ошомиданӣ танқисӣ мекашиданд. Дар деҳаи мазкур бо дастгирии ҳукумати ноҳия соҳибкорони маҳаллӣ дар ду мавзеъ дар чуқурии 100 ва 150 метр чоҳҳои амудӣ канда насосҳои обкаширо васл намуданд. Барои таъмини пурраи аҳолӣ бо об зарфҳои 50 куба гузошта ба ҳар як кӯча се чор нуқтаи об гузарониданд. Мувофиқи ташхиси мутахассисон оби чоҳҳои кандашуда тоза, безарар ва барои истеъмол мувофиқ аст.