Раванди таҳсили донишҷўён дар хориҷа меафзояд

Душанбе, 9 июл.(АМИТ «Ховар», Марзия Саидова).-Беш аз 700 нафар шаҳрвандони Тоҷикистон дар соли равон ба донишгоҳу донишкадаҳои гуногуни Русия дохил шуда, дар зинаҳои бакалавр, магистр, аспирант ва шўъбаҳои тайёрӣ ба таҳсил фаро гирифта мешаванд. Аз ҷумла, дар донишгоҳу донишкадаҳои Санкт-Петербург 39 бакалавр ва 31 магистр, Кемерово 80 бакалавр, Красноярск ва Томск 100 бакалавр, 30 магистр ва 20 аспирант, Новочеркес 50 бакалавр ва Воронеж 25 бакалавр фиристонида мешавад. Таҳсили донишҷўёни тоҷик дар мактабҳои олии Русия дар асоси Созишномаҳои байнидавлатӣ, ки миёни Тоҷикистону Русия ба имзо расидаанд, сурат мегирад. Бояд тазаккур дод, ки тибқи Созишномаи Болоня /Италия/ бакалавр, мутахассис, магистр ва аспирантура зинаҳои маълумоти олӣ буда, баъди гузаштани онҳо шахсон соҳиби дипломи доктор PJ мешаванд. Абдусаттор Одинаев — мудири бахши рушди таҳсилоти байналмилалии Вазорати маорифи кишвар дар сўҳбат ба хабарнигори АМИТ «Ховар» гуфт, ки донишҷўёни тоҷик асосан дар риштаҳои марбут ба техникаю технология, муҳандисию геология ва дигар ихтисосҳои табиию риёзӣ, ки Тоҷикистон ба он ниёзи бештар дорад, ба таҳсил фаро гирифта мешаванд. Инчунин дар соли ҷорӣ ба мактабҳои олии Қазоқистон 100 нафар ва ба Украина 20 нафар донишҷў фиристонида мешавад. Ҳамзамон 80 нафар донишҷўёни Донишгоҳи славянии Тоҷикистону Русия ва донишкадаи забонҳо ба курси яксолаи забономўзӣ ба Ҷумҳурии Мардумии Чин мераванд.