Роҳандозии ихтисосҳои нав дар Донишгоҳи бонуфуз

Душанбе, 10 июл.(АМИТ «Ховар», Марзия Саидова).- «Панҷ ихтисоси нав соли равон дар Донишгоҳи давлатии тиҷорати Тоҷикистон ба роҳ монда шуда, алҳол қабули довталабон аз рўи онҳо идома дорад»,- гуфт дар сўҳбат ба хабарнигори АМИТ «Ховар» Қобилҷон Толибов, муовини раиси Донишгоҳи давлатии тиҷорати Тоҷикистон оид ба таълим.
Ихтисосҳои нав, ки соли ҷорӣ бори нахуст дар Донишгоҳи тиҷорати Тоҷикистон ба роҳ монда мешаванд ҳуқуқи байналмилалии тиҷоратӣ, иқтисодиёт ва идора дар корхонаҳои меҳмонхона ва тарабхона, фаъолияти рекламавӣ, иқтисодиёт ва ташкили истеҳсолот, саёҳат ва меҳмондорӣ мебошанд. Ихтисосҳои мазкур бо назарадошти талаботи бахшҳои мухталиф, ки кишварамон ба он бештар эҳтиёҷ дорад, ҷорӣ карда мешаванд. Қ. Толибов афзуд, ки алҳол дар Донишгоҳи тиҷорати Тоҷикистон қабули довталабон, ки аз 20 июн оғоз шудааст, ҷараён дошта, он то 31 июл идома меёбад. Тибқи нақша дар соли таҳсили 2012-2013 ба Донишгоҳ 800 нафар донишҷў дар бахши рўзона ва 350 нафар дар бахши ғоибона қабул карда мешавад. Таҳсил дар Донишгоҳ ба таври шартномавӣ ба роҳ монда шуда, маблағи таҳсил барои як донишҷўи бахши рўзона дар як сол 950 доллар ва барои донишҷўи шўъбаи ғоибона 750 доллар аст.Супоридани имтиҳоноти дохилшавӣ ба таври тестӣ сурат мегирад. Ҳамзамон ба донишгоҳ 75 нафар донишҷўён барои гирифтани маълумоти дуюм ба шўъбаҳои рўзонаю ғоибона қабул карда мешавад. Барои шахсоне, ки мехоҳанд маълумоти дуюмро дар бахши рўзона гиранд синнашон бояд то 35 бошад. Барои нафарони бахши ғоибона синну сол маҳдудият надорад.
 Бояд тазаккур дод, ки Донишгоҳи тиҷорати Тоҷикистон, яке аз донишгоҳҳои бонуфузи Тоҷикистон маҳсуб ёфта, соли равон аз таъсисёбиаш 25 сол сипарӣ гардид. Дар он наздики 6 000 донишҷў дар риштаҳои рўзонаю ғоибона ба таҳсил фаро гирифта шуда, ҳайати 400 нафараи олимону устодони Донишгоҳ ба донишҷўён аз рўи 18 ихтисос сабақ медиҳанд. Беш аз 25 нафар устодони Донишгоҳ курсҳои такмили ихтисосро дар кишварҳои хориҷӣ, назири Русия, Украина, Белорус, Лаҳистон, Испания ва Австрия гузаштаанд.