“Корвони китоб” то куҷо ҳаракат дорад?

Душанбе, 2 август. (АМИТ «Ховар», Мавҷуда Анварӣ). — Бо ташаббуси Вазорати фарҳанги Ҷумҳурии Тоҷикистон ҷиҳати иҷрои дастуру супоришҳои Президенти мамлакат Эмомалӣ Раҳмон аз 19 –ум то 26-уми июли соли ҷорӣ бо иштироки намояндагони Дастгоҳи иҷроияи Президенти ҶТ, Вазорати фарҳанг ва аҳли илму адаб ба шаҳру ноҳияҳои вилояти Бадахшон «Корвони китоб» сафарбар карда шуд.Дар ин бора Шавкат Ҳабибуллоев муовини сардори Корхонаи воҳиди давлатии «Таъминот ва савдои китоб»- и Вазорати фарҳанг ба хабарнигори АМИТ «Ховар» хабар дод.Тибқи иттилои манбаъ, дар доираи ин чорабинӣ намоиши китобҳои тозанашр, тақсими китобҳо ва маросими супоридани китобҳои тозанашри нашриёти давлативу хусусӣ, аз ҷумла «Ирфон»-у «Адиб» ба шӯъбаҳои фарҳанги шаҳру ноҳияҳо баргузор гардид. Имсол барои такмили захираи китобхонаҳои шаҳру ноҳияҳои вилояти Бадахшон 2157 нусха китоб бо маблағи 24 ҳазору 421 сомонӣ тақдим карда шуд. Ёдовар мешавем, ки ҳаракати “Корвони китоб” дар шаҳру навоҳии ВМКБ, вилоятҳои Суғд, Хатлон ва ноҳияҳои тобеи марказ аз 2 июл то 3 августи соли ҷорӣ сурат мегирад. Дар айни ҳол “Корвони китоб” дар водии Рашт қарор дорад.