ТВ «СМТ» ба мавҷи нав гузашт

Душанбе, 7 август. (АМИТ «Ховар», Дилшодаи Хайруллоҳ).- Аз 6 августи соли 2012 ягона телевизиони хусусии пойтахти кишвар- «Симои мустақили Тоҷикистон» пахши барномаҳояшро дар басомади нав оғоз кард. Дар ин бора муассис ва директори ин телевизион Зинатулло Исмоилов хабар дод. Тавре ки иттилоъ доред, беш аз ду сол боз ТВ «СМТ» дучори мушкилот буд. Он ҳарчанд иҷозатномаи қонунии фаъолият дар басомади 29-ро дошт, вале базаи ҳарбии Русия, мустақар дар Тоҷикистон барномаҳои шабакаи аввали телевизиони Русияро ғайриқонунӣ дар ҳамин басомад пахш мекард ва барои бинандагони ТВ «СМТ» нороҳатиҳо эҷод менамуд. Инак ҳаводорони барномаҳои ТВ «СМТ» дар шаҳри Душанбе, ноҳияҳои Ваҳдат, Варзоб, Рӯдакӣ, Ҳисор, Шаҳринав ва Ёвону Файзобод имкон доранд ҳамарӯза барномаҳоро аз соати 18.00 то 23.00 ва аз соати 08.00 то соати 14.00 бемамониат тамошо кунанд. — Барои тамошои барномаҳои мо,- мегӯяд Зинатулло Исмоилов,- дар пулти телевизоратон тугмаи «меню»-ро пахш карда, бахши «настройка» — ро дарёбед. Сипас тавассути «ручная настройка» дар мавҷи детсиметрии UHF, дар басомади 550 мГц метавонед барномаҳои ТВ «СМТ»-ро бароҳатӣ тамошо кунед. Ёдовар мешавем, ки СМТ аввалин телевизиони хусусии ҷамъиятию сиёсии пойтахт буда, аз 18 июни соли 2007 фаъолият дорад. Симои мустақили Тоҷикистон чеҳраи нави Тоҷикистон аст.