Қабули лоиҳаи Кодекси андози Ҷумҳурии Тоҷикистон

Душанбе, 5 сентябр. (АМИТ «Ховар», Дилшодаи Хайруллоҳ). — Имрӯз таҳти раёсати Раиси Маҷлиси намояндагони Маҷлиси Олии Ҷумҳурии Тоҷикистон Шукурҷон Зуҳуров иҷлосияи дуюми ғайринавбатии Маҷлиси намояндагони Маҷлиси Олии Ҷумҳурии Тоҷикистон даъвати чорум баргузор гардид, ки дар он лоиҳаи Кодекси андози Ҷумҳурии Тоҷикистон мавриди баррасӣ қарор гирифт.Аз рӯи масъалаи аввали рӯзномаи иҷлосия- лоиҳаи Кодекси андози Ҷумҳурии Тоҷикистон вазири молияи Ҷумҳурии Тоҷикистон Сафаралӣ Наҷмиддинов ва муовини раиси кумитаи иқтисод ва молияи Маҷлиси намояндагон Сафаралӣ Гулов суханронӣ намуда, аз ҷумла изҳор доштанд, ки дар лоиҳаи Кодекси нави андоз расмиёти андозбандӣ ва ҳисобдиҳӣ хеле соддаю шаффоф пешбинӣ шудааст ва ҳадафи асосии он баланд бардоштани адолатнокию самарабахшӣ, сабук намудани бори андозҳо ва тавассути зиёд кардани шумораи андозсупорандагон ғанӣ гардонидани буҷети давлат мебошад.Таъкид гардид, ки қабули Кодекси андоз дар таҳрири нав, ки ҷавобгӯи шароити кунунии иҷтимоию иқтисодии кишвар аст, яке аз афзалиятҳои сиёсати Ҳукумати Ҷумҳурии Тоҷикистон дар солҳои охир ба ҳисоб меравад ва дар ин замина ҳанӯз 24 июни соли 2011 бо Қарори Ҳукумати Ҷумҳурӣ Комиссияи махсус таъсис гардида буд. Комиссия дар давоми қариб як сол бо ҷалби доираи васеи мутахассисон, коршиносон ва аҳли ҷомеа таҳлилу баррасии муқаррароти алоҳидаи лоиҳаи нави Кодекси андозро ба сомон расонид. Дар лоиҳаи нави Кодекси андоз тартиби андозбандӣ ва маъмурикунонии он бамаротиб содда гардонида шуда, шумора ва ҳаҷми андозҳои пешбинишаванда нисбат ба кодекси амалкунанда ба таври назаррас кам гардидааст, ки ҳамаи ин дар маҷмӯъ барои некӯаҳволии мардуми шарифи Тоҷикистон ва беҳтарсозии вазъи соҳибкории хурду миёна нигаронида шудааст. Сабукӣ ва имтиёзҳои дар лоиҳаи нави Кодекси андоз пешбинишаванда, ҳамчунин барои мусоид гардидани фазои иқтисодии кишварамон ҷиҳати сармоягузорӣ заминаи мустаҳками меъёрию ҳуқуқиро фароҳам месозад.Лоиҳаи Кодекси андози Ҷумҳурии Тоҷикистон пас аз муҳокимаи густарда ва баррасии боб ба боб ва модда ба модда қабул гардид.Дар иҷлосияи дуюми ғайринавбатии Маҷлиси намояндагони Маҷлиси Олии Ҷумҳурии Тоҷикистон даъвати чорум, ҳамчунин масъалаҳо дар бораи пешниҳодҳои Президенти Ҷумҳурии Тоҷикистон «Оид ба таъйин намудани Дилмурод Давлатов ба вазифаи раиси Палатаи ҳисоби Ҷумҳурии Тоҷикистон» ва «Оид ба таъйин намудани Хуршед Каримов ба вазифаи муовини раиси Палатаи ҳисоби Ҷумҳурии Тоҷикистон» баъди ёд кардани савганд тасдиқ гардиданд.