Қадрдонии кормандони ҳифзи ҳуқуқ

Душанбе, 11 сентябр. (АМИТ «Ховар», Мавҷуда Анварӣ). — Ба муносибати 21-умин солгарди таҷлили Истиқлолияти давлатии кишвар дар Вазорати корҳои дохилӣ ҷаласаи тантанавӣ баргузор гардид.Вазири корҳои дохилӣ Рамазон Раҳимов ҳамаи кормандон, собиқадорон ва оилаҳои кормандонеро, ки ҳангоми адои вазифа ҷон бохтаанд, бо Иди истиқлол табрику муборакбод намуда, зикр кард: «Саҳми кормандони мақомоти корҳои дохилӣ дар таҳкими Истиқлолият, сохти конститусионӣ ва мубориза бар зидди ҷинояткорӣ, ҳифзи тартиботи ҷамъиятӣ ва ҳуқуқу озодиҳои шаҳрвандон назаррас ва арзанда мебошад». Котиби Шӯрои амнияти ҶТ Абдураҳим Қаҳҳоров аз номи Роҳбари давлат, Президенти Ҷумҳурии Тоҷикистон Эмомалӣ Раҳмон кормандони мақомоти корҳои дохилиро бо ҷашни фархунда табрик гуфта, ба як гурӯҳ кормандон мукофотҳои давлатӣ супорид.Вазири корҳои дохилӣ ба собиқадорон ва оилаҳои кормандони мақомоти корҳои дохилӣ, ки ҳангоми адои вазифа ҷон бохтаанд, мукофотпулӣ тақдим намуда, варзишгарон — аъзои ҷамъияти варзишии «Динамо»-и Вазорати корҳои дохилиро, ки дар бозиҳои 30-юми олимпиадаи Лондон-2012 ба натиҷаҳои назаррас ноил гардиданд, бо мукофотҳои пурарзиш сарфароз гардонид. Аз ҷумла, ба Мавзуна Чориева дастгоҳи наворбардорӣ ва маблағи муайяни пулӣ, ба мураббияш низ маблағи муайяни пулӣ тақдим гардид. Ҳамзамон аз номи мардуми Бадахшон ба Мавзуна Чориева либоси бадахшонӣ супорида шуд. Мавриди зикр аст, ки бо Фармони Президенти Ҷумҳурии Тоҷикистон шаҳрвандони Ҷумҳурии Тоҷикистон аз ноҳияи Тоҷикобод Асоев Шамсиддин Фатҳуддинович ва Зоиров Шамсиддин Давлатович барои ҳамкорӣ ва кӯмак расонидан ба мақомоти корҳои дохилӣ дар мубориза бар зидди ҷинояткорӣ бо «Ифтихорномаи Ҷумҳурии Тоҷикистон» сарфароз гардонида шуданд. Ҳамчунин кормандони дигари Вазорати корҳои дохилӣ ба ифтихори 21-умин солгарди Истиқлол бо нишону медалҳои сарисинагӣ мукофотонида шуданд.