З. Ализода ба Екатеринбург меравад

Душанбе, 7 сентябр.(АМИТ «Ховар», Дилшодаи Хайруллоҳ).- Бо ташаббуси Созмони ҷамъиятии «Маркази оид ба ҳуқуқҳои инсон» ваколатдори ҳуқуқи инсон Зариф Ализода дар ҳошияи лоиҳаи «Таҳкими иқтидори дафтари ваколатдори ҳуқуқи Ҷумҳурии Тоҷикистон дар бахши ҳифзи ҳуқуқҳои муҳоҷирони меҳнатӣ» аз 9 то 13 сентябр аз шаҳри Екатеринбурги Федератсияи Русия дидан мекунад. Ин сафари корӣ бо мақсади зиёд кардани донишҳои кормандони дафтари ваколатдори ҳуқуқи инсон дар бахши муҳоҷирати меҳнатӣ, аз ҷумла, принсипҳои кор бо муҳоҷирони меҳнатӣ ва ҳифзи ҳуқуқҳои онҳо созмон дода мешавад. Ғайр аз ин, барномаи сафари корӣ мулоқот бо кормандони Хадамоти муҳоҷирати ҶТ ва Консулхонаи ҶТ дар вилояти Сердловск ва вохӯрӣ бо муҳоҷирони меҳнатии тоҷикро дар бар мегирад. 14 сентябр дар шаҳри Маскав мулоқоти Зариф Ализода бо ваколатдори ҳуқуқи инсони шаҳри Маскав А.Музикантский баргузор мегардад. Дар доираи сафари корӣ кормандони дафтари ваколатдори ҳуқуқи инсони ҶТ таҷрибаи фаъолияти дафтари ваколатдори ҳуқуқи инсони вилояти Свердловскро дар амри ҳифзи ҳуқуқҳои муҳоҷирони меҳнатӣ меомӯзанд.