Зикри имконияти Тоҷикистон дар бахши сайёҳии байналмилалӣ

Душанбе, 12 сентябр. (АМИТ «Ховар», Мавҷуда Анварӣ). — Имрӯз муовини аввали вазири корҳои хориҷии кишвар Маҳмудҷон Собиров дар иҷлосияи ҷашнӣ ва мулоқоти чоруми вазирони корҳои хориҷии давлатҳои аъзои Машварати ҳамкорӣ ва тадбирҳои боварӣ дар Осиё, ки дар шаҳри Остонаи Қазоқистон баргузор шуд, иштирок ва суханронӣ намуд. Маҳмудҷон Собиров дар бораи масъалаҳои таҳкими амнияти минтақавӣ, аз ҷумла, мавқеъ ва саҳми Ҷумҳурии Тоҷикистон дар раванди барқарорсозии иқтисоди Афғонистон суханронӣ карда, аҳамияти зиёди тақвияти бештари ҳамкории кишварҳоро дар мубориза бар зидди терроризму экстремизми байналмилалӣ ва дигар хатарҳои таҳдидкунанда зикр намуд.Тавре ки аз Раёсати иттилоот, матбуот, таҳлил ва тарҳрезии сиёсати хориҷии ВКХ ҶТ ба АМИТ «Ховар» хабар доданд, таваҷҷӯҳи ҳозирин ба мушкилоти нақлиётию коммуникатсионӣ ва дигар монеаҳо дар рушди ҳамгироии фарогир дар Осиёи Марказӣ ҷалб гардида, ҷиҳати роҳандозии фаъоли ҳамкориҳои иқтисодию энергетикӣ аз кишварҳои узви МҲТБО даъват ба амал оварда шуд. Масъалаҳои марбут ба гуфтугӯи тамаддунҳо ва рушди ҳамкориҳои сайёҳию гуманитарӣ низ аз мавзӯъҳои меҳварии суханронии муовини аввали вазири корҳои хориҷӣ буд. Дар ин робита имконот ва захираҳои табиию инфрасохтории Тоҷикистон дар бахши сайёҳии байналмилалӣ зикр гардид.