Ҷаласаи вазирони фарҳанги АвруОсиё дар Душанбе

Душанбе, 9 октябр. (АМИТ «Ховар», Раъно Нусратуллоева).- Аз 15 то 17 октябр дар шаҳри Душанбе панҷумин ҷаласаи Шӯрои фарҳанги назди Кумитаи ҳамгироии Иттиҳоди иқтисодии АвруОсиё доир мешавад. Дар он вазирони фарҳанги Беларус, Қазоқистон, Қирғизистон, Федератсияи Русия ва Тоҷикистон ширкат меварзанд. Тибқи барномаи иҷлосия мулоқоти вазири фарҳанги Тоҷикистон Мирзошоҳрух Асрорӣ бо ҳамтоёни меҳмони худ, боздид аз Китобхонаи миллӣ, музейи осори бостонӣ, ҳамчунин баргузории Конфронси байналмилалии кишварҳои узви Иттиҳоди иқтисодии АвруОсиё таҳти унвони «Масоили ҳифз, истифода, тармим ва нигоҳдории ёдгориҳои таърихию фарҳангӣ» ва нишасти матбуотии вазирони фарҳанг пешбинӣ шудааст. Дар ҷаласа ҷараёни иҷрои қарорҳои 4-умин ҷаласаи Шӯрои фарҳангии АвруОсиё, Созишномаи самтҳои ҳамкориҳои фарҳангӣ дар доираи АвруОсиё, татбиқи барномаи тадбирҳо дар бобати иҷрои дурнамои самтҳои асосии ҳамкории кишварҳои узви АвруОсиё, ҷараёни омодагӣ ба Ҷашнвораи севвуми халқҳои АвруОсиё, инчунин масоили сиёсати фарҳангии Иттиҳоди иқтисодии АвруОсиё мавриди баррасӣ қарор мегиранд.
 
Дар ин бора ба мухбири АМИТ «Ховар» аз Вазорати фарҳанги ҷумҳурӣ Раҳматулло Раҳматуллоев хабар дод.