Хадамоти муҳоҷират «Раҳнамои муҳоҷири корӣ»-ро маҳкум кард!

Душанбе, 23 октябр. (АМИТ «Ховар», Музаффар Рустамов). – Хадамоти муҳоҷирати назди Ҳукумати Ҷумҳурии Тоҷикистон назари расмии худро доир ба интишори китобчае, ки бо номи «Раҳнамои муҳоҷири корӣ» чанде қабл дар шаҳри Санкт-Петербурги Федератсияи Русия бо теъдоди 10 ҳазор нусха чоп гардид ва дар он муҳоҷирон ба сурати ҷорӯбу чӯткаи рангмолӣ ва андовачӯбу ғелак нишон дода шудаанд ва шакли электронии он дар шабакаҳои ҷаҳонии интернет низ ҷойгир шудааст, онро аз нигоҳи арзиши инсонӣ рафтори носавоб ва муғризона медонад.Ин амали номатлуб, ки аз сӯи гуруҳҳои алоҳида барои «ҳадафҳои нопок» роҳандозӣ шудааст, таҳқири муҳоҷирони меҳнатӣ мебошад. Хадамоти муҳоҷират даъват ба амал меорад, ки масъалаи мазкур аз сӯи мақомоти ваколатдор мавриди тафтишот ва баррасӣ қарор дода шуда, аз интишори чунин падидаҳои номатлуб, ки дар халалдор кардани раванди осоиштаи кору зиндагии мардум ва ба вуҷуд овардани тирагиҳо миёни қавму миллатҳои гуногун кор мегирад, ҷилавгирӣ намоянд. Ба иддаои Хадамоти муҳоҷират онҳое, ки даст ба чунин иқдом задаанд, ҳаргиз ба мақсадҳои шуми хеш нахоҳанд расид, зеро ин амали нораво аз сӯйи ҷомеаи ҷаҳонӣ ва мутамаддин ба ҳеҷ ваҷҳ мавриди пуштибонӣ қарор нахоҳад гирифт.Ин дастурамал, ки аз ҷониби ташкилоти ҷамъиятии «Назаре ба оянда» дар доираи лоиҳаи «Ғарбу Шарқ» бо забонҳои тоҷикиву ӯзбекӣ ва қирғизӣ тарҷума ва нашр шудааст, мавҷи эътирозҳоро дар миёни созмонҳои ҳомии ҳуқуқ ва худи муҳоҷирон дар Русия ба бор овардааст ва бояд ин амал мавриди тафтиши мақомот қарор гирифта, маводи мазкур аз байн бурда шавад.Дар ин бора ба АМИТ”Ховар” аз шуъбаи робита бо ҷомеаи Хадамоти муҳоҷирати назди Ҳукумати ҶТ Абдуллоҳи Қодирӣ иттилоъ дод.