«Созандагони Ватан» дар саҳрову майдон

Душанбе, 1 октябр. (АМИТ «Ховар», Дилшодаи Хайруллоҳ)- Дирӯз фаъолони намояндагии Ташкилоти ҷамъиятии ҷавонон «Созандагони Ватан» дар вилояти Суғд дар ҳайати зиёда аз 200 нафар ҷавон дастҷамъона барои дастгирӣ ва кӯмак ба пахтакорони хоҷагии деҳқонии «Нурафшон»-и ноҳияи Ҷаббор Расулов ба саҳро бароманд. Мақсад дастгирӣ ва саҳмгузор будан дар кори ҷамъоварии ҳосили пахта ва ба ин восита ҷалби ҷавонон ба корҳои кишоварзӣ мебошад, зеро асоси пешрафти иқтисодиёти кишвар ба рушди соҳаи аграрӣ иртибот дошта, маҳз бо кадрҳои баландтахассуси соҳаи кишоварзӣ метавон иқтисодиётро боло бардошт, зикр кард зимни тамос роҳбари намояндагии «Созандагони Ватан» дар вилояти Суғд Насимчон Маликисломов. Инчунин бо дастгирии Кумитаи иҷроияи ҲХДТ дар вилояти Суғд ва ташаббуси намояндагии «Созандагони Ватан» бахшида ба 20-солагии баргузории Иҷлосияи ХУ1 Шӯрои Олии Ҷумҳурии Тоҷикистон бо иштироки бонувони футболбози вилоят чорабинии варзишӣ баргузор гардид. Давоми 3-рӯз дар мусобиқа 5 дастаи бонувони футболбоз аз шаҳру ноҳияҳои вилоят ширкат варзиданд. Бозии ниҳоӣ байни дастаҳои шаҳрҳои Қайроққум ва Хуҷанд бо ҳисоби 3 бар 0 бар фоидаи дастаи шаҳри Қайроққум анҷом ёфт. Аз рӯи ҷамъбасти натиҷаҳо ҷои аввал ва Ҷоми ҲХДТ насиби дастаи шаҳри Қайроққум гардид. Ҷойҳои дуюм ва сеюмро дастаҳои шаҳру ноҳияҳои Хуҷанду Мастчоҳ ишғол намуданд. Дар маросими ҷамъбасти чорабинӣ ба ғолибон тӯҳфа ва ифтихорнома супориданд.