Таъкид: низоми амниятӣ дар фурудгоҳ пурзӯр шавад!

Душанбе, 9 октябр. ( АМИТ «Ховар», Саидэҳсони Солеҳ).- Дар ҷаласаи ҷамъбастии «Фурудгоҳи байналмилалии Душанбе» ҳисоботи 9-моҳаи кори фурудгоҳ аз ҷониби Азим Иброҳимов, муовини раиси ин ниҳод ва кормандони сохторҳои зертобеи он пешниҳод шуд. Гуфта шуд, ки ба 565,142 нафар мусофири рафта ва ба 419,672 мусофири омада, яъне нисбат ба ҳамин давраи соли 2011-ум 15,9% бештар хизмат расонида шуд. Миқдори умумии бор ва почтаи қабулгардида ва интиқолдодашуда аз ҷониби анбори тиҷоратии «Фурудгоҳи байналмилалии Душанбе» дар нуҳ моҳи соли 2012–ум 1530 тоннаю 431 кг- ро ташкил дод.  Таъкид гардид, ки дар давраи ҳисоботӣ хадамоти амнияти авиатсионии фурудгоҳ мутобиқи меъёрҳои Ташкилоти байналхалқии авиатсионӣ — ИКАО амал намуда, амнияти мусофирон, бор ва бағоҷро пурра таъмин намуд. Мутобиқи талабот амнияти пурраи авиатсионӣ тавассути воситаҳои гуногуни муоинаи мусофир, бор ва бағоҷ, системаи мушоҳидаю сабти видеоӣ таъмин карда шуд. Дар ҷаласа ба беҳтар намудани сатҳи хизматрасонӣ, такмили маҳорату малакаи касбии кормандон, пурзӯр кардани низоми амният, мустаҳкам намудани интизоми меҳнат, назорати ҷиддитар нисбат ба пешгирии вуруди бемориҳои махсусан вазнини сирояткунанда ба ҷумҳурӣ таъкид шуд.