Тақвияти мубориза оид ба хариду фурӯши одамон

Душанбе, 20 декабр. (АМИТ «Ховар», Дилшодаи Хайруллоҳ).-Имрӯз маҷлиси Гурӯҳи кори мубориза оид ба хариду фурӯши одамон доир гардид, ки онро роҳбари гуруҳи корӣ-муовини раиси Кумитаи ҷавонон, варзиш ва сайёҳии назди Ҳукумати Ҷумҳурии Тоҷикистон Мавсума Муинова оғоз бахшид. Баъдан муовини сардори Раёсати ҷавонони Кумита, котиби гуруҳи корӣ Қиёмиддин Миралиев оид ба натиҷаҳои нақшаи корӣ маълумот дод. Номбурда аз ҳозирин даъват ба амал овард, ки дархосту мулоҳизаҳояшонро дар бораи нақшаи кори гуруҳ барои соли 2013 пешниҳод намоянд.Аз ҷониби намояндаи Вазорати маорифи Ҷумҳурии Тоҷикистон пешниҳод гардид, ки зиёд намудани чорабиниҳои тарғиботиву ташвиқотӣ ва сафарҳои корӣ ба минтақаҳо ба нақша ворид карда шавад.Намояндаи Кумитаи телевизион ва радиои назди Ҳукумати Ҷумҳурии Тоҷикистон таҳияи барномаҳои телевизиониро оид ба пешгирӣ ва мубориза ба муқобили хариду фурӯши одамон пешниҳод кард.Аз ҷониби аъзои гуруҳи корӣ пешниҳод гардид, ки барномаҳои телевизионӣ дар ин мавзӯъ бештар тарғибу ташвиқ шаванд ва ин банд ба нақшаи корӣ ворид шуд. Намояндаҳои Кумитаи давлатии амнияти миллӣ ва Вазорати тандурустӣ барои ҳамкориҳои муштарак ибрози ақида намуданд.Гуруҳи кории мубориза бар зидди хариду фурӯши одамон дар поёни ҷаласа бо назардошти пешниҳоду дархостҳои аъзои гуруҳ нақшаи кориро барои соли 2013 тасдиқ намуд.