Ҳалли масоили ҳалталаб зимни қабули шаҳрвандон

Кӯлоб, 2 апрел. (АМИТ «Ховар», С.Холов). – Раиси вилояти Хатлон Ғайбулло Афзал рӯзи 30 марти соли ҷорӣ дар шаҳри Кӯлоб бо шаҳрвандон вохӯрд. Вохӯрӣ бо мақсади амалӣ гардидани қабули шаҳрвандон ва суҳбат кардан бо роҳбарони ташкилоту муассисаҳои вилоятию шаҳрӣ буд.Муроҷиаткунандагнон бештар барои гирифтани замини манзилӣ, нарасидани оби нӯшокӣ дар маҳаллаҳои дурдаст, таъмини симчӯб барои кашидани хати барқ, таъмини нафақа ба кӯдакони маъюб, нарасидани маблағ барои муолиҷа ва дигар норасоиҳои иҷтимоӣ сухан гуфтанд. Ғ.Афзал ба роҳбарони ташкилотҳои дахлдор дастур дод, ки мушкилоти шаҳрвандонро зуд ҳал карда, натиҷаи онро ба ҳукумати вилоят пешниҳод кунанд. Инчунин зикр кард, ки аз буҷаи вилоятӣ низ ба ниёзмандон кӯмак расонида мешавад.