М. Убайдуллоев бо ҳайати парлумонӣ ба Русия рафт

Душанбе, 10 апрел.(АМИТ «Ховар», Марзия Саидова).- Ҳайати парлумонии Тоҷикистон таҳти роҳбарии Маҳмадсаид Убайдуллоев -раиси Маҷлиси миллии Маҷлиси Олии Ҷумҳурии Тоҷикистон ҷиҳати иштирок дар ҷаласаи Шӯрои Ассамблеяи Байнипарлумонии давлатҳои Иттиҳоди Давлатҳои Мустақил /ИДМ/ ба шаҳри Санкт-Петербурги Русия сафар кард. Ҳамзамон ҳайати парлумонии Ҷумҳурии Тоҷикистон дар чорабиниҳои Ассамблеяи Байнипарлумонии Иттиҳоди иқтисодии Аврупову Осиё /ИИАО/ ва Ассамблеяи Парлумонии Созмони Аҳдномаи Амнияти Дастаҷамъӣ /СААД/ иштирок менамояд. Шавкат Саидов –ёвари раиси палатаи болоии Парлумони ҷумҳурӣ ба АМИТ «Ховар» иттилоъ дод, ки сафари ҳайати парлумонии Тоҷикистон дар Санкт-Петербург то 13 апрел идома меёбад. Интизор меравад, ки парламентарҳои тоҷик дар доираи чорабиниҳои Ассамблеяи байнипарлумонии ИДМ, ИИАО ва СААД ҷиҳати таҳкими равобити байнипарлумонӣ бо намояндагон ва парламентарҳои кишварҳои аъзои созмонҳои мазкур мулоқот анҷом дода, табодули назар кунанд.