Чанд хабар аз хориҷи кишвар

Таркиши чархбол дар Афғонистон
 
Душанбе, 8 май .(АМИТ «Ховар»).- Тавре ки дар торномаи интернетии www.rbc.ru навишташудааст, дар қаламрави Ҷумҳурии Исломии Афғонистон ҳавопаймои боркаши Иёлоти Муттаҳидаи Амрико суқут кард. Ба иттилои расонаҳои маҳаллӣ, ҳавопаймои тамғаи «Боинг- 747-400» баъди чанд лаҳзаи парвоз аз пойгоҳи низомии Багром ба фалокат дучор омадааст. Дар ҷои ҳодиса 8 нафар аъзои сарнишин ба ҳалокат расида, чанд каси дигар ҷароҳатҳои вазнин бардошта, ба беморхонаи марказии шаҳр интиқол дода шудааст. Ҳукуматдорони Афғонистон ваъда доданд, ки дар пайи ҳамла дучори шикаст шудани ҳавопайморо истисно мекунанд. Аммо ҷангиёни Ҳаракати «Толибон» масъулияти ҳодисаро бар дўш нагирифтаанд. Вале ба гуфти мутахассисони соҳаи техникии кишвар сабаби фалокати ҳавопаймо нуқсони техникӣ ба шумор меравад. Баъди бархўрд ба замин ҳавопаймо оташ гирифта, ба ду қисм ҷудо шуд. Ҳавопаймо ба ширкати соҳавии «National Air Cargo»-и Иёлоти Муттаҳидаи Амрико тааллуқ дорад.
Боришоти барфи зиёд дар Испания
 
Душанбе, 8 май .(АМИТ «Ховар»).-Тавре ки www.rg.ru менависад, дар Испания боридани барфи зиёд барои сокинон ва хоҷагии халқи мамлакат мушкилоти зиёд пеш овард. Дар 26 минтақаи кишвар чунин вазъияти номусоиди ҳаво ҳукумфармост. Қабати барф дар ин минтақаҳо аз 20 то 50 сантиметрро ташкил медиҳад. Бар асари боришоти зиёди барф ҳаракати воситаҳои нақлиёт дар шоҳроҳҳо қатъ гардидааст. Ба гуфти роҳбари БДА кишвар барои тоза кардани роҳҳо аз барфтўдаҳо кормандони Хадамоти коммуналӣ бо истифода аз техникаҳои махсус фаъолият мебаранд. Ҳавосанҷон чунин вазъи ҳаворо барои чанд рўзи дигар пешгўӣ мекунанд.Тарҷумаи Иброҳими Ҳабибуллоҳ