Муҳокимаи масоили муҳоҷирон ва фарҳангу маърифати онҳо

Душанбе, 27 май. (АМИТ «Ховар», Марҳабо Зунунова). – Чанде пеш дар Маркази матбуоти тайналмилалии «РИА Новости» — и шаҳри Маскав мизи мудаввар дар мавзӯи «Русия ва Тоҷикистон: равобити иҷтимоӣ, фарҳангӣ ва маърифатӣ» баргузор гардид. Дар ҷараёни мизи мудаввар перомуни сиёсати ҳукуматдорони Русия нисбат ба муҳоҷирони меҳнатии Тоҷикистон, ҳамчунин вазъу дурнамои муносибатҳои ҳар ду кишвар дар бахшҳои фарҳангу маориф сухан ронда шуд. Дар ин бора муншии аввал, роҳбари дафтари матбуоти Сафорати Ҷумҳурии Тоҷикистон дар Федератсияи Русия Муҳаммад Эгамзод ба АМИТ «Ховар» хабар дод.Мувофиқи хабари манбаъ, дар ин чорабинӣ ҳамчунин коргардони театру синамо Валерий Аҳадов, корманди калони илмии Маркази омӯзиши Осиёи Марказӣ, Қафқоз ва Уралу Поволжеи Пажӯҳишгоҳи шарқшиносии Академияи илмҳои Русия Азиз Ниёзӣ, муовини раиси Маркази табодули меҳнатӣ Сулаймон Шоҳзода, котиби матбуоти Намояндагии Хадамоти муҳоҷирати назди Ҳукумати Ҷумҳурии Тоҷикистон дар Федератсияи Русия Иброҳим Аҳмедов ширкат доштанд.