Боздошти аъзои гуруҳи ҷиноӣ

Душанбе, 2 июл (АМИТ «Ховар»).- 28-уми июни соли равон кормандони Раёсати Кумитаи давлатии амнияти миллии Ҷумҳурии Тоҷикистон дар Вилояти Мухтори Куҳистони Бадахшон якҷоя бо намояндагони Прокуратураи вилоят, Раёсати корҳои дохилӣ ва Раёсати Агентии назорати маводи нашъаовари назди Президенти ҶТ дар ҳудуди ноҳияи Шуғнон амалиёт гузаронида, қочоқчии номӣ, яке аз аъзои гуруҳи ҷинояткори шаҳри Хоруғ Бозоров Темурбек Наврўзбекович, соли таваллудаш 1965, сокини деҳаи Миденшори, ҷамоати Поршиневи ноҳияи Шуғнон, маълумоташ миёнаи махсус, муваққатан бекор ва писараш Бозоров Элбек Темурбекович, соли таваллудаш 1990, маълумоташ олӣ, хатмкардаи Донишгоҳи куҳии металлургии ш. Чкаловски вилояти Суғдро бо гумони фурўши маводи мухаддир ба шаҳрвандон Худобахшов Худобахш Алибахшович, соли таваллудаш 1966, сокини д. Миденшори ҷамоати Поршинев, Хушдилов Ҳабиб Пурдилович, соли таваллудаш 1970, сокини шаҳраки Ваҳдати ҷамоати Поршинев, Тайғунов Тайғун Нодиршоевич, соли таваллудаш 1965, сокини деҳаи Хосаи ҷамоати Поршинев ва Пираков Мародмамад Давлатмамадович, соли таваллудаш 1957, сокини деҳаи Буведи ҷамоати Поршиневи н. Шуғнон, боздошт намуданд. Дар натиҷаи кофтукови шахсии дастгиршудагон Худобахшов Худобахш ва Пираков Мародмамад аз ҷайби онҳо маводи сафедчатоби дорои бӯи махсуси монанд ба маводи мухаддири навъи «героин» ва сўзандору дарёфт гардид, ки аз гирифтори касалии нашъамандӣ будани онҳо далолат мекунад. Номбурдагон ҳангоми пурсиш иқрор шуданд, ки маводи мухаддирро аз Бозоров Темурбек харидорӣ кардаанд.Зимни азназаргузаронии хонаи истиқоматии Бозоров Темурбек, зиёда аз 2 кг «героин», 50 грамм бангдона, як адад таппончаи Макаров бо 34 дона тир, 40-адад тири милтиқ, 300 грамм сангҳои қиматбаҳо, 27 ҳазор сомонӣ, як адад қаиқ барои амалӣ намудани кирдорҳои қочоқӣ тавассути сарҳади давлатии ҶТ бо ҶИА ва либоси махсуси обногузар, инчунин 1 адад корднайза (штык-нож) дарёфт ва мусодира гардиданд. Сангҳои қиматбаҳоро Бозоров Темурбек аз як корманди раёсати ҳолатҳои фавқулодда ва мудофиаи гражданӣ гирифта, бар ивазаш ба ў героин додааст.Боиси нигаронист, ки дар ҳудуди ВМКБ зиёда аз ҳазор нафар гирифтори бемории нашъамандианд ва Бозоров Темурбек яке аз паҳнкунандагони маводи мухаддир, алалхусус навъи «героин» ба шумор мерафт. Соли равон 2 нафар сокини маҳаллии гирифтори нашъамандӣ аз зиёдшавии ҳаҷми истеъмолии героин дар назди манзили истиқоматии ў ба ҳалокат расиданд. Дар давоми 10 соли охир бошад, 210 нафар ҷавонон дар натиҷаи зиёд кардани ҳаҷми истеъмолии маводу мухаддир ҳалок шудаанд. Ҳангоми суҳбат Бозоров Темурбек якчанд ҳаммаслакони худро ифшо кард, ки даст ба ҳаракатҳои зиддиқонунӣ мезаданд. Айни замон аз ҷониби шуъбаи тафтишотии Раёсати Кумитаи давлатии амнияти миллӣ дар ВМКБ нисбати Бозоров Темурбек Наврўзбекович ва шариконаш бо дастрасии моддаи 200 қ. 4 бандҳои «в», «г», 289 қ. 2, 195 қ.1, 284 қ.1 КҶ ҶТ парвандаи ҷиноятӣ оғоз ёфтааст ва тафтишоти пешакӣ идома дорад.Амалиёти мазкур аз рўйи муроҷиати як қатор модарони шахри Хоруғ ва ноҳияи Шуғнон, ки фарзандонашон аз тарафи шаҳрванд Бозоров Темурбек Наврўзбекович гирифтори касалии вазнини нашъамандӣ гардида, аз ҷониби ў барои иҷрои корҳои сохтмонию хоҷагидориаш мавриди истифода қарор мегирифтанд, тарҳрезӣ ва гузаронида шуд. Кумитаи давлатии амнияти миллии Ҷумҳурии Тоҷикистон ба сокинони сарбаланди ВМКБ ҷиҳати масъулияшиносӣ ва ҳамкориашон баҳри решакан сохтани ҳаракатҳои ҷиноӣ, арзи сипос намуда, онҳоро мутмаин месозанд, ки ҷинояту ҷинояткорон сари вақт ошкор гардида, барои аъмоли худ дар назди қонун ҷавоб хоҳанд гуфт. Нисбати фаъолияти чунин гурўҳҳои ҷиноятпеша дар тамоми манотиқи ҷумҳурӣ муборизаи беамон ва қотеъона ба роҳ монда мешавад.