Дастовези «Тоҷикматлубот» ба ҷашни Истиқлол

Душанбе, 24 июл.(АМИТ «Ховар», Марзия Саидова).-Интизор меравад, ки дар остонаи ҷашни Истиқлолияти давлатии Тоҷикистон дар ноҳияи Балҷувон меҳмонхонаи нави замонавӣ мавриди баҳрабардорӣ қарор гирад. Ин иншоот бо ибтикори Иттифоқи «Тоҷикматлубот»-и кишвар дар партави амалӣ намудани дастури Сардори Давлат сурат гирифта, бо маблағи беш аз 1 млн. 300 ҳазор сомонӣ бунёд мешавад. Алҳол корҳои сохтмонӣ дар ин иншоот ба маблағи 1070 ҳазор сомонӣ азхуд карда шудаанд, ки 80%-и онро корҳои сохтмонӣ ташкил медиҳад.  Назар ба иттилои Сироҷиддин Валиев –раиси Иттифоқи «Тоҷикматлубот»-и кишвар дар ин меҳмонхона тамоми шароитҳо марбут ба рушди туризм ва хизматрасонӣ барои сайёҳони хориҷӣ фароҳам оварда мешавад. Интизор меравад, ки дар оянда дар ин минтақаи куҳистони кишвар, ки бо қарори Ҳукумати Ҷумҳурии Тоҷикистон минтақаи туризм эълон гардидааст, намудҳои туризми дучархасаворӣ, аспсаворӣ, куҳнавардӣ рушд ёфта, он дӯстдоштарин макони сайёҳони хориҷӣ гардад.