Гуҷадур ва Калашев тренерони маҳаллиро омӯзиш доданд

Душанбе, 8 июл.(АМИТ «Ховар», Марзия Саидова).- 11 мутахассиси тоҷик зимни як давраи омӯзишии чаҳоррӯза мавзуоти вобаста ба Созишномаи Созмони тиҷорати ҷаҳонӣ /СТҶ/ доир ба чораҳои санитарӣ ва фитосанитариро /СФС/ омӯхтанд. Давраи омӯзишии мазкур дар доираи лоиҳаи «Иҷрои талаботи СТҶ ва огоҳии доираҳои тиҷоратӣ аз шароити узвият ба он» баргузор гардид. Ин лоиҳа аз ҷониби Идораи давлатии Швейтсария дар умури иқтисод (СЕКО) маблағгузорӣ шуда, онро Маркази тиҷорати байналмилалӣ /МБТ/ амалӣ менамояд. Ҳадафи баргузории ин давраи омӯзишӣ баланд бардоштани сатҳи огаҳии тренерони баргузида аз тафсилоти Созишномаи СТҶ доир ба СФС дар заминаи тиҷорат аст. Дар ин чорабинӣ мушовирони байналмилалии МТБ — Шиям Кумар Гуҷадур ва Эдил Калашев омӯзгори тренерони маҳаллӣ буданд. Ширкаткунандагони давраи омӯзишӣ дар ҷараёни он фаъолона таҷрибаи соҳавӣ ва роҳҳои мутобиқ кардани барномаи таълимӣ барои соҳаи вижаро бо назардошти ниёзҳои кишвар омӯхтанд. Мушовири байналмилалӣ Шиям Кумар Гуҷадур мегӯяд: «тренерон бо Созишномаи СТҶ доир ба чораҳои СФС ва методологияи МТБ муфассалтар шинос шуданд ва дониши омӯзгории худро боло бурдаву дар анҷоми давра соҳиби сертификат гардиданд». Баъд аз анҷоми давраи омӯзишӣ 8 мутахассис ба ҳайси тренерҳои МБТ барои баргузории давраҳои маҳаллии омӯзишӣ дар минтақаҳои гуногуни кишвар интихоб гардиданд.