Вуруди 298,4 ҳазор тонна гандум дар шаш моҳ

Душанбе, 25 июл.(АМИТ «Ховар», Фарзона Достонзода).-Аз ҷониби хадамот дар нимсолаи аввали соли 2013 аз ҳисоби қонунвайронкунии зиддиинҳисории Ҷумҳурии Тоҷикистон дар бораи рақобат ва маҳдудкунии фаъолияти зиддиинҳисорӣ, монополияҳои табиӣ, дар соҳаи ҳимояи ҳуқуқи истеъмолкунандагон ва реклама ҳамагӣ маблағи 291161,71 сомонӣ ошкор гардида, маблағи 235009 сомонӣ ҳисоббаробар карда шудааст. Ин нуктаро зимни нишасти матбуотӣ сардори Хадамоти зиддиинҳисории Тоҷикистон Ҳамдам Тағоймуродов зикр намуд.Вай афзуд, ки тибқи маълумоти гумрукӣ ба ҷумҳурӣ ғалла асосан аз Ҷумҳурии Қазоқистон ворид карда мешавад. Дар 6 моҳи соли ҷорӣ ба ҷумҳурӣ 298,4 ҳазор тонна гандум бо нархи миёнаи 355 доллари ИМА барои 1 тонна ворид шудааст. Таҳлилҳо нишон медиҳанд, ки дар 6 моҳи соли ҷорӣ бозори воридоти гандум рақобатпазир буда, иштирокчиёни он 56 субъекти хоҷагидориро ба ғайр аз соҳибкорони инфиродӣ ташкил медиҳанд, ки дар таносуб ба 90,6 фоиз баробар буда, 9,4 фоизи дигар ба соҳибкорони инфиродӣ рост меояд.Тибқи маълумот нархи миёнаи орди якуми истеҳсоли Ҷумҳурии Казоқистон бо вазни 50 кг дар бозорҳои шаҳри Душанбе аз 140 то 145 сомонӣ, дар бозори шаҳри Хуҷанд 138-140 сомонӣ, дар бозори шаҳри Курғонтеппа аз 145 то 150 сомонӣ ва орди якуми истеҳсоли ватанӣ бо нархи 145,3 сомонӣ ба фурӯш бароварда шудааст.