293 шаҳрванди хориҷӣ аз қаламрави Тоҷикистон берун карда шуд

Душанбе, 14 август. (АМИТ «Ховар», Лайло Қосимова).- Тавре ки аз дафтари матбуотии Хадамоти муҳоҷирати назди Ҳукумати Ҷумҳурии Тоҷикистон ба хабарнигори АМИТ «Ховар» хабар доданд, дар тӯли 7 моҳи соли 2013 кормандони Хадамоти муҳоҷирати назди Ҳукумати ҶТ дар маҷмуъ 508 протоколи ҳуқуқвайронкунии маъмурӣ нисбат ба шаҳрвандони хориҷие, ки дар Тоҷикистон будубош доранд, тартиб дода, 293 нафари онҳоро аз қаламрави Ҷумҳурии Тоҷикистон берун карданд.  «Аз ҷумла, 74 нафари онҳо шаҳрванди Ҷумҳурии Мардумии Чин, 33 нафар шаҳрванди Афғонистон, 41 нафар шаҳрванди Ӯзбекистон, 62 нафар шаҳрванди Покистон, 4 нафар шаҳрванди Бангладеш ва 7 нафар шаҳрванди Ҷумҳурии Исломии Эрон буданд»,-гуфт сухангӯи Хадамоти муҳоҷирати назди Ҳукумати ҶТ Абдуллоҳи Қодирӣ. Аз 215 нафари боқимонда ҷарима ситонида шуд.