Фавти ҷавони 27-сола дар муноқиша

Душанбе, 23 август. (АМИТ «Ховар», Фарзона Ашӯрмадова).-Дар натиҷаи муноқиша як ҷавони 27-сола ҷони худро аз даст дод.Тавре ки дар ин бора сомонаи Вазорати корҳои дохилии кишвар хабар додаст, дар натиҷаи гузаронидани чорабиниҳои фаврӣ-ҷустуҷӯӣ бо гумони даст доштан ба одамкушӣ шаҳрванд Ҳомид Нусратов, соли таваллудаш 1965, сокини деҳаи Навободи ноҳияи Панҷ дастгир карда шуд. Номбурда 21 августи соли ҷорӣ дар ҳудуди деҳаашон бо шаҳрванд Меҳрдоди Муҳаммад, соли таваллудаш 1986, сокини деҳаи мазкур вохӯрда, аз сабаби муноқишаи ба миён омада, бо корди дар дасташ буда, як маротиба ба қафаси синаи охирон мезанад. Дар натиҷа Меҳрдоди 27-сола ҷароҳати вазнини ҷисмонӣ бардошта, ҳангоми ба беморхона интақол намудан дар роҳ ба ҳалокат расидааст. Аз рӯи ҳодисаи мазкур парвандаи ҷиноӣ оғоз шуда, тафтиш идома дорад.