Ифтитоҳи филиали Tcell дар Кӯлоб

Кӯлоб, 2 август. (АМИТ «Ховар», Фарҳод Мадаминов).- Дар шаҳри Кӯлоб аз ҷониби ширкати Tcell барои хизматрасонии хуби мобилӣ зиёда аз 1 млн. сомонӣ сарф гардид ва бинои филиали марказӣ дар шаҳри Кӯлоб ба истифода дода шуд. Бинои мазкур аз ду ошёна иборат буда, дар ошёнаи якум қисмати хизматрасонии чакана ва корпораторӣ ва дар ошёнаи дуюм утоқи кории кормандони филиал ҷойгир аст. Дар филиали мазкур зиёда аз 20 нафар шаҳрванд бо ҷои кори доимӣ таъмин гардида, маоши миёнаи онҳо дар як моҳ аз 450 то 600 сомониро ташкил медиҳад. Дар минтақаи Кӯлоб ҷамъи умумии мизочони ширкат 90 ҳазорро ташкил медиҳад. Филиал ният дорад, ки минбаъд хизматрасонии худро ба мизоҷон хубтар ба роҳ монад.