Кӯмак ба беморон аз ҷониби Салиби Сурх

Восеъ, 20 август. (АМИТ «Ховар», С. Холов).-Дар ноҳияи Восеъ намояндагии Ҷамъияти Ҳилоли Аҳмари Точикистон бо волонтёрҳои худи ҷамъият вохӯрӣ доир намуд ,ки дар он беш аз 20 нафар аъзо ширкат варзид. Мақсад аз вохӯрӣ пешгирии бемории сил ва дар ин замина баррасии корҳои анҷомдодаи аъзои ҷамъият оид ба ташвиқоту тарғибот дар ҷамоатҳо ва мактабҳои таҳсилоти умумӣ дар тӯли як соли сипаригардида мебошад. Паримо Раззоқова, танзимгари барномаи мазкур гуфт, ки бемории сил табобатшаванда буда, шумораи беморон нисбат ба соли гузашта қариб ду баробар кам гардидааст. Инчунин зикр кард, ки шумораи гирифторони ин беморӣ дар минтақаи Кӯлоб 560 нафарро дар бар гирифта, аксари онҳо сокинони шаҳри Кӯлоб ва ноҳияи Ҳамадониянд. Ҷиҳати фароҳам овардани шароити мусоид барои беморон ва решакан кардани ин беморӣ аз ҷониби Салиби Сурхи Финляндия ва Иттиҳоди Аврупо ба беморон кӯмаки аввалиндараҷа расонида шуд.