Корвони тандурустӣ дар Шӯрообод- Шохон

Шӯрообод, 31 август. (АМИТ «Ховар», С. Холов).-Кормандони соҳаи тандурустии минтақаи Кӯлоб бо мақсади расонидани кӯмаки ройгони тиббӣ аз тариқи корвони саломатӣ дар давоми ду рӯз сохтмончиёни қитъаи роҳи Шӯрообод- Шоҳонро аз ташхис гузарониданд. Барои муоинаи роҳсозон беҳтарин мутахассисон сафарбар карда шуданд. Дар ин қитъаи роҳ 200 нафар сокинони маҳаллӣ ва 50 нафар шаҳрвандони хориҷӣ кор мекунанд. Хусусан сохтмончиён аз давлати Туркия барои ба тарзи ройгон аз ташхису муоина гузаронидани шаҳрвандони хориҷӣ изҳори миннатдорӣ карданд.Мавриди зикр аст, ки корвони тандурустӣ дар баробари роҳсозон ташхиси ройгони сокинони якчанд деҳаи ҷамоати деҳоти Даштиҷум ва Ёлро низ анҷом дод. Гуфта мешавад мувофиқи нақша корвони саломатӣ моҳи сентябр ба ҷамоати деҳоти Сарихосор низ сафарбар мешавад.