Маҳбуби мардум

Душанбе, 21 август. (АМИТ «Ховар», Ҳотам Рабиев).- Чанде қабл дар маркази ноҳияи Шаҳринав барномаи ҳунарии сарояндаи хушовоз Убайдуллоҳи Каромат доир гардид. Убайдуллоҳи Каромат овозхони мумтоз, боистеъдод ва навовар буда, сурудҳояш табъи дили мардуманд. Аз фаъолияти эҷодии ӯ дар рӯи саҳнаи тоҷик 30 сол сипарӣ гардид. Ӯ дар хондани сурудҳои «Шашмақом», фолклорӣ, ишқӣ, панду насиҳатӣ ҳамто надошта, қариб бо лаҳҷаю шеваи ҳар манотиқи кишвар сурудҳое эҷод кардааст, ки писанди кулли аҳолии мамлакат аст. Ҳоло ӯ ҳамчун роҳбари бадеии ансамбли «Садои Шарқ» дар Филармонияи давлатии Тоҷикистон дар айни авҷи камолоти эҷодӣ буда, баҳри сайқал додани маҳорати эҷодияш ва тарбияи шогирдон саъю кӯшиш дорад.