Машқи дастаи мунтахаби ҷавонон дар Норак

Душанбе, 22 август. (АМИТ «Ховар»). – Назар ба хабари Федератсияи футболи Тоҷикистон, дар ин рӯзҳо дастаи мунтахаби ҷавонони Тоҷикистон оид ба футбол дар ҳошияи тайёрӣ ба сабқати интихобии мусобиқоти Осиё дар гурӯҳи «Д» дар шаҳри Норак машқ мекунад.Сармураббии дастаи мунтахаби ҷавонони кишвар Салоҳиддин Ғафуров 27 нафар бозингаронро барои иштирок дар ин мусобиқот даъват намудааст.Дастаи мунтахаби футболбозони ҷавон пеш аз оғози мусобиқоти Осиё 27 август бо дастаи мунтахаби наврасони Тоҷикистон ва 31 август бо дастаи клуби «Истиқлол» қувваозмоӣ мекунад. Хотирнишон месозем, ки дар сабқати интихобии мусобиқоти Осиё байни дастаҳои мунтахаби ҷавонон дастаи Тоҷикистон дар гурӯҳи «Д» қувваозмоӣ намуда, аз 8 то 12 октябр дар варзишгоҳи «Шаҳид Баҳонар» — и шаҳри Кирмоншоҳи Эрон бо дастаҳои мунтахаби Эрон, Арабистони Саудӣ ва Лубнон вомехӯрад.